भानु स्मरण दिवस एवम् पुरस्कार अलङ्करण समारोह सम्पन्न
बाग्राकोट : डुवर्स नेपाली साहित्य विकास समितिको तत्त्वावधानमा बाग्राकोट उच्चतर माध्यमिक विद्यालय, बद्रीनारायण प्रधान स्मृति प्रतिष्ठान र साहित्य परिक्रमाको संयुक्त सहयोगमा आयोजित भानु स्मरण दिवस एवम् पुरस्कार अलङ्करण समारोह-२०२५ भव्य रूपमा सम्पन्न भएको छ। भीमसेन भवन, बाग्राकोटमा आयोजित यस कार्यक्रममा डुवर्सभित्रको साहित्यिक चेतना र सांस्कृतिक उत्तराधिकारको उच्च सम्मान गरिएको देखियो।
समारोहको अध्यक्षता समितिका अध्यक्ष अबीर खालिङले गरेका थिए भने प्रमुख अतिथि थिए वरिष्ठ साहित्यकार ज्ञानेन्द्र खतिवडा। विशिष्ट अतिथिको रूपमा डा. साङ्मु लेप्चा, गोपालसिंह विश्व, ललित न्यासुर, बसन्ती शर्मा कालेबुङ, जेठा सुब्बा लगायत धेरैजसो साहित्य, समाज र संस्कृति क्षेत्रमा क्रियाशील व्यक्तित्वहरूको गरिमामय उपस्थिति रहेको थियो।
कार्यक्रमको प्रारम्भमा स्वर्गीय कृष्ण योञ्जन ‘गडबडे’, पद्मश्री सानु लामा र गोकुलसिंह थापाप्रति श्रद्धाञ्जली अर्पण गरी एक मिनेट मौन धारण गरिएको थियो। त्यसपछि स्वागत गीत तथा स्वागत मन्तव्य प्रस्तुत गरियो। विद्यालयका बालबालिकाले प्रस्तुत गरेको स्वागत गीत विशेष आकर्षणको केन्द्र बन्यो।
समारोहका मुख्य अतिथि सालबारीका वरिष्ठ साहित्यकार ज्ञानेन्द्र खतिवडाले आफ्नो मन्तव्यका क्रममा भने, “डुवर्सले आज डुवर्सलाई नै सम्मान दिएको छ। साहित्य, सङ्गीत, कला, समाज तथा भूमिसँगको माया गर्नेहरूलाई आज डुवर्सले हृदयदेखि सम्मान गरेको छ। हाम्रो दार्जीलिङ, सिलगढीबाट केही हुने आशामा बसेका छौँ, तर डुवर्स भने आशामुखी छैन। डुवर्स आफ्नै खुट्टामा उभिएको छ।”
खतिवडाले अझ भने,“यो पुरस्कार कार्यक्रम आफ्ना बाउबाजेलाई छोरा–नातिले दिएको सम्मान जस्तै हो। जलपाइगुड़ीतिर केही छैन भनेर आशामुखी हुनु हुदैन। आत्मनिर्भर बन्ने प्रेरणा लिनुपर्छ।” उक्त मन्तव्यले उपस्थित सम्पूर्णलाई नयाँ ऊर्जा प्रदान गरेको थियो।
पुरस्कार अलङ्करण समारोह
यस वर्ष विभिन्न क्षेत्रका चार विशिष्ट व्यक्तित्वहरूलाई स्मृति पुरस्कारबाट सम्मान गरिएको थियोः
- ११औँ चन्द्रवीर प्रधान स्मृति पुरस्कार : साहित्य क्षेत्रका लागि कथाकार अशोक रोका
- १०औँ हैकमसिंह राई स्मृति पुरस्कार : समाजसेवामा दुर्गा चामलिङ
- ७औँ कितापसिंह राई स्मृति पुरस्कार : शिक्षा क्षेत्रमा सागर राई देवान
- १०औँ बी.बी. दर्नाल स्मृति पुरस्कार : सङ्गीत क्षेत्रमा बाबुलाल सुब्बा
पुरस्कृत सबैलाई दोसल्ला, सम्मान-पत्र र पुरस्कार राशीसहित प्रदान गरिएको थियो।
त्यस्तै कार्यक्रममा गोकुलसिंह थापाको लोकगीत ‘नक्कली मैच्याङ्गलाई’ पनि सार्वजनिक गरिएको थियो। गीतमा स्वर विक्रम कालिकोटे, सङ्गीत गौतम विश्वकर्मा र उमेश रोकाले दिएका छन्।
साहित्यिक प्रस्तुति र समापन
कार्यक्रममा वसन्ती शर्मा, सुदर्शन तामाङ, पवित्रा लामालगायतले कविता वाचन गरे।
बीर्पाडा हाम्रो समाज नारी प्रकोष्ठका सदस्यहरूले सांस्कृतिक प्रस्तुति राखे।
सम्पूर्ण कार्यक्रमको सञ्चालन समितिका कार्यकारी अध्यक्ष रूपेश शर्माले गर्नुभएको थियो।
कार्यक्रममा अध्यक्ष अबीर खालिङले डुवर्स नेपाली साहित्य विकास समितिको गतिविधिलाई निरन्तर अगाडि बढाउने दृढ संकल्प दोहोर्याउँदै भने, “डुवर्समा साहित्यिक चेतना रोप्ने काम हाम्रा अग्रजहरूले गर्नुभएको हो, हामी त्यसलाई ससम्मान हस्तान्तरण गर्दै जानेछौँ।”
याे पनि हेर्नुस्
