दलसिंहपाडा रणबहादुर बस्तीमा हात्तीको ताण्डव

दलसिंहपाडा रणबहादुर बस्तीमा हात्तीको ताण्डव : घर दोकान भत्काएर अन्नपानी तहसनहस


दलसिंहपाडा : कालचिनी ब्लक अन्तर्गत दलसिंहपाडा ग्राम पञ्चायतस्थित रणबहादुर बस्तीमा हात्तीको झुण्डले शनिबार राति ताण्डव मच्चाएको छ। रणबहादुर बस्तीका बासिन्दा चित्रबहादुर क्षेत्री (लाटा माइला) र माइला क्षेत्रीको घर हात्तीले भत्काएर रासिन र पानी तहसनहस पारिदिएको छ। त्यस्तै कमल लामाको दोकान भत्काई सामानहरू इधर–उधर पारिदिएको गाउँलेहरूले बताएका छन्। हात्तीको झुण्डले तुर्सा खोला छेउकी रिना क्षेत्रीको सुपारी बारी पनि नष्ट गरेको छ। रिनाको भनाइअनुसार राति करिब १ देखि ३ बजेको बीचमा आएको हात्तीको बथानले फल्दै गरेका (गुवा) सुपारी बोट ढालिदिएको थियो। “राति मुसलधारे पानी परेको र अन्धकार भएकाले घरबाट निस्कनै नसक्ने अवस्था थियो,” उनले भनिन्, “फरेस्ट डिपार्टमेन्टबाट राखिएका भोलिन्टियरहरू पनि समयमा नआएपछि हात्तीले निर्बाध रूपमा विध्वंस गर्‍यो।”

स्थानीय उमा गुरुङका अनुसार यसअघि गाउँमा धान, कोदो, मकै, तोरी जस्ता बाली लगाइन्थ्यो। तर हात्तीको आक्रमण बढेपछि ती खेती छोडेर (गुवा) सुपारीमा निर्भर हुन थालेका थिए। “सुपारी रोपेपछि फल्न १२ वर्ष लाग्छ,” उनले दुखेसो पोखिन्, “१२ वर्षको प्रतीक्षापछि फल दिन थालेको सुपारी यसरी तहसनहस हुँदा हामी किसानको मर्म चर्को भएको छ।” उनले सुपारीको क्षतिपूर्ति दिन र हात्ती नियन्त्रणमा ठोस पहल गर्न फरेस्ट डिपार्टमेन्टसँग माग गरिन्।

घटनाको निरीक्षण गर्न गाउँबासीको तर्फबाट ग्राम पञ्चायत समिति महेन्द्र धमला र ग्राम पञ्चायत सदस्य सदस्य कान्छा लामा पुगे। कान्छा लामाले भने, “गाउँलाई हात्तीको आक्रमणबाट बचाउने हाम्रो प्रयास जारी छ, तर विभागको ध्यान कम छ। भोलिन्टियरहरू घटनास्थलमा समयमा नपुग्दा यस्ता घटनाहरू दोहोरिरहेका छन्।” तिनले फरेस्ट डिपार्टमेन्टलाई विशेष कमिटी गठन गरी भोलिन्टियरलाई सक्रिय बनाउने सुझाव दिए। घटनापछि मिलन क्षेत्री, राजु राना लगायत स्थानीय युवा र गाउँलेहरू भेला भई पीडित परिवारको सहयोग र घटनास्थलको अवलोकन गरेका थिए।

याे पनि हेर्नुस्


Leave a comment