बानरहाटमा चितुवाको आक्रमण, ११ वर्षीय बालकको दुःखद मृत्यु
बानरहाट : बानरहाट थाना अन्तर्गत आङ्ग्राभाषा २ नम्बर ग्रामपञ्चायतको केलाबारी बस्ती खुट्टाबारी क्षेत्रमा बुधबार साँझ चितुवाको आक्रमणमा परी ११ वर्षीय बालकले ज्यान गुमाएका छन्। मृतक बालक करिमुल हक (पिता– खोलिल रहमान, उमेर– ११ वर्ष) भएको पुष्टि भएको छ।
घटना साँझ करिब ६:३० बजे भएको बताइएको छ। जानकारी अनुसार करिमुल आफ्ना साथीसँगै घर अगाडि बाटोमा बसिरहेका बेला अचानक चितुवाले आक्रमण गर्दै तिनलाई उठाएर नजिकैको जङ्गलतर्फ लगेको थियो। साथीको चिच्याहट सुनेर गाउँलेहरू ठूलो सङ्ख्यामा बाहिर निस्किएर हल्ला गरेपछि चितुवाले करिमुललाई बैगुनबारीमा छोडेर भागेको थियो। तर, उद्धारका लागि पुगेका स्थानीयले करिमुललाई मृत अवस्थामा फेला पारे।
यो घटनापछि गाउँभर शोक र त्रास फैलिएको छ। स्थानीयवासीहरूले यसअघि पनि वरपर चितुवाको गतिविधि देखिएको भन्दै वन विभाग र प्रशासनलाई तत्काल सुरक्षा व्यवस्था कडा पार्न माग गरेका छन्। तर खबर लेखुञ्जेलसम्म घटनास्थलमा वन विभाग नपुगेको स्थानीय स्रोतले जनाएको छ।
याे पनि हेर्नुस्
