दिपक शर्माको निधनले कालचिनीमा छायो शोकको लहर
कालचिनी
कालचिनी भेगका ७२ वर्षीय समाजसेवी दिपक शर्माको निधनले स्थानीय नागरिक, आफन्तजन र शुभचिन्तकहरूमा गहिरो शोक छाएको छ।
कालचिनी गोरे लाइन निवासी शर्मा पछिल्ला तीन वर्षदेखि देहरादूनमा बस्दै आएका थिए। स्वास्थ्य समस्याका कारण उपचाररत अवस्थामा शुक्रबार देहरादूनस्थित एक निजी अस्पतालमा तिनको निधन भएको पारिवारिक स्रोतले जनाएको छ।
शर्मा जीवनकालमा प्रत्यक्ष राजनीतिक पदमा सक्रिय नभए पनि तत्कालीन वाममोर्चा, त्यसपछि राष्ट्रिय समाजवादी पार्टी (आरएसपी) हुँदै भारतीय जनता पार्टी (भाजपा) शिविरमा समेत रहेर काम गरेका थिए। यद्यपि, तिनी मूलत: सामाजिक क्षेत्रमा आफ्नो सक्रियताका कारण चर्चित थिए।
कोभिड महामारीको समयमा उनका तीनमध्ये एक छोराको मृत्यु भएपछि तिनी बाँकी दुई छोरासँगै देहरादून बस्न थालेका थिए। तर, कालचिनीमा तिनको नाम र योगदान रहेको कारण यहाँको नागरिक समाजमा पनि तिनको निधनको खबरले गहिरो पीडा उत्पन्न गराएको छ।
स्थानिय बासिन्दाले समाजसेवीको निधनलाई क्षेत्रकै ठूलो क्षति बताउँदै श्रद्धाञ्जली अर्पण गरेका छन्।
याे पनि हेर्नुस्
