डुवर्सका जे.बी. छेत्री र इन्द्रबहादुर गुरुङलाई जीटीएद्वारा भाषा-सङ्ग्रामीका रूपमा नागरिक सम्मान
जयगाउँ : डुवर्सका वरिष्ठ भाषा-सङ्ग्रामी जे.बी. छेत्री र इन्द्रबहादुर गुरुङ (मरणोप्रान्त) लाई गोर्खा टेरिटोरियल एड्मिनिस्ट्रेशन (जीटीए) ले यस वर्षको भाषा-सङ्ग्रामी नागरिक सम्मान प्रदान गर्ने भएको छ। जीटीएका जनसूचना अधिकारी वीरेन गुरुङले आज दुवै व्यक्तिका परिवारलाई आधिकारिक रूपमा जानकारी दिँदै गैरीवासमा आगामी २६ अगस्टका दिन आयोजना हुने कार्यक्रममा उपस्थित भइदिन अनुरोध गरेका छन्। भाषा मान्यताको सन्दर्भमा जीटीएले अगस्ट महिनाभर विविध कार्यक्रमहरू सञ्चालन गरिरहेको छ। सोही शृङ्खलामा हुने यस कार्यक्रममा डुवर्सका प्रमुख भाषा-सङ्ग्रामी जे.बी. छेत्रीलाई प्रत्यक्ष सम्मान गरिनेछ भने दिवङ्गत इन्द्रबहादुर गुरुङलाई मरणोपरान्त सम्मान अर्पण गरिनेछ।
स्मरणीय छ, इन्द्रबहादुर गुरुङ राष्ट्रिय स्तरका भाषा-सङ्ग्रामीका रूपमा चिनिन्छन् भने जे.बी. छेत्री डुवर्सकै अग्रज भाषा-योद्धा हुन्। यसअघि जीटीएले डुवर्सका बी.एम. योञ्जन, ललित न्यासुर र मीनबहादुर गुरुङलाई दार्जीलिङमा विशेष सम्मान अर्पण गरिसकेको छ। विगत केही वर्षदेखि जीटीएले डुवर्सेली भाषा-सङ्ग्रामीहरूलाई वर्षेनि सम्मान गर्ने परम्परा सुरु गरेको छ, जसले डुवर्सको नेपाली भाषा आन्दोलन र योगदानलाई ऐतिहासिक स्मरणमा राखिरहेको छ।
याे पनि हेर्नुस्
