जयगाउँ पुलिसको प्रमुख कारबाही: ठूलो परिमाणको लागूऔषध क्याप्सुलसहित युवक पक्राउ
जयगाउँ : जयगाउँ पुलिसले बिहीबार साँझ लागूऔषधविरोधी अभियानअन्तर्गत भानु मोड चेकपोस्टमा नियमित नाका जाँचका क्रममा ठूलो सफलता हात पारेको छ। फालाकाटाबाट जयगाउँतर्फ आउँदै गरेको बस चेकजाँचको क्रममा, अलिपुरद्वार जिल्लाको समुक्तला ग्रामपञ्चायत अन्तर्गत नम्बर २ स्कूल नजिकै मथुरा चिया बगान निवासी ३१ वर्षीय उत्तम सिंह पक्राउ परेको छ । तिनको कब्जाबाट ७,४८८ थान “SPM-PRX + n” क्याप्सुल, जसको तौल करिब २.८५४ किलो, बरामद गरिएको पुलिसले जनाएको छ।
गोप्य स्रोतले दिएको जानकारीअनुसार, अभियुक्तले विभिन्न स्थानमा साना पाउचमार्फत लागूऔषध वितरण गर्ने योजना बनाएको थियो। तिनी यसअघि दलसिंहपाडा क्षेत्रमा आपूर्ति गरिसकेको र मङ्गलाबारे क्षेत्रमा अर्को खेप पुर्याउने तयारीमा रहेको खुलासा भएको छ। यस सम्पूर्ण कारबाही पुलिस अधिकारी हरि थिङको नेतृत्वमा, उप-निरीक्षक सुबिमल बर्मन, अन्य पुलिस कर्मचारी तथा एक मजिस्ट्रेटको उपस्थितिमा सम्पन्न गरिएको थियो। बरामद लागूऔषधलाई NDPS ऐन अन्तर्गत आवश्यक कागजात, भिडियोग्राफीसहित प्रमाणित गरी प्याक र सिल गरिएको पुलिसले जनाएको छ। पक्राउ परेका सिंहलाई जयगाउँ पुलिस चौकीमा ल्याई NDPS ऐन अन्तर्गत मुद्दा दर्ता गरिएको छ। तिनलाई थप अनुसन्धान तथा रिमान्डको लागि शुक्रबार अलिपुरद्वार अदालतमा पेश गरिनेछ।
याे पनि हेर्नुस्
