साहित्यकार बिर्ख खड्का‘डुवर्सेली’ डुवर्स गौरव सम्मान प्रदान
लुकसान : डुवर्सको लुकसानमा आइतबार ३४औँ नेपाली भाषा मान्यता दिवस भव्य रूपमा पालन गरियो| कार्यक्रमको आयोजना डुवर्स नेपाली साहित्य विकास समिति अनि लुकसान ग्रामीण कल्याण संस्था,लुकसान जुनियर हाई स्कूल अनि लुकसान नेपाली प्राथमिक विद्यालयको सहकार्यमा लुकसानस्थित गोर्खा भवनमा गरिएको थियो| समारोह अघि विद्यार्थीहरूले भव्य शोभायात्रा निकालिएको थियो| जसमा नेपाली भाषा र संस्कृतिको सम्मानमा नारा लगाइएका थियो|
कार्यक्रमको अध्यक्षता डुवर्स नेपाली साहित्य विकास समितिका अध्यक्ष अबीर खालिङले गरेका थिए भने समारोहको मुख्य अतिथि सुपरिचित युवा कवि एवम् भाषा मान्यताको इतिहास लेखक सुवास सोताङ, विशिष्ट अतिथि राज्यसभा सांसद प्रकाश चिक बडाइक साथै विशेष अतिथिहरू पुष्पण प्रधान, समाजसेवी राजेश छेत्री, भाषा संग्रामी मीनबहादुर गुरुङ,नगरकट्टा पञ्चायत समिति सभापति सञ्जय कुजुर, समाजसेवी प्रेम छेत्री, साहित्यकार गोपालसिंह विश्व,दुर्गा चामलिङ, काजी पाण्डे,जे.वी छेत्री,के.वी. महत,साहित्यकार आशबहादुर लिम्बु, कथाकार अशोक रोका, बाग्राकोट हाई स्कुलका प्रधानाध्यापक सागर शर्मा, विनोद सुब्बा,कुमार गोले, साहित्यकार जर्नादन थापा,अशोक गिरी, दिलिप यल्मो, महिपाल सुब्बा लगायत अन्य प्रतिष्ठित व्यक्तित्वहरू उपस्थित थिए|
कार्यक्रमलाई सम्बोधन गर्दै साहित्यकार जनार्दन थापाले भाषाको इतिहास, महत्व र विकास कसरी गर्नुपर्ने विषयमा वक्तव्य राखे| कार्यक्रमको मुख्य अतिथि सुवास सोताङले कार्यक्रमलाई सम्बोधन गर्दै भने,डुवर्स चेतनाले भरिएको/सचेत व्यक्तिहरूको ठाउँ हो| डुवर्सको भाषा-सङ्ग्रामको धेरै पाटो छ| अलग्गै लेख्न सकिएको छैन| डुवर्सका भाषा-सङ्ग्रामीहरूको छुट्टै लेखन आवश्यक छ| डुवर्सका अग्रजहरूले बलियो विरासत छोड़ेर गएका छन्| नयॉं पिढ़ी थप सक्रिय र शक्तिशाली छ| डुवर्समा ठूलो कार्यक्रम गर्नु चुनौतीपूर्ण भए पनि डुवर्सले काम गरिरहेको छ| दार्जीलिङमा गएको राजनीतिक भुइँचालोको प्रत्यक्ष प्रभाव डुवर्समा पर्छ| डुवर्स लड्दै अघि बढ्छ, अजीर छ,फेरि उठ्छ डुवर्स| २० अगस्त नेपाली भाषाले मान्यता पाएको दिन हो| यसको प्रचार-प्रसार हुन नसक्नु विडम्बना हो| गोर्खा/नेपाली भाषाको विवादको सन्दर्भ उल्लेख गर्दै यसकै कारण नेपाली भाषाको विकासमा बाधा उत्पन्न भयो बताए| अहिले खोजीखोजी सम्मान दिइँदैछ| त्यसबेला खोजीखोजी शास्ति दिने काम भयो| नेपाली भाषाले अन्य भाषाले जस्तै सहुलियत पाउँछ|
कार्यक्रमलाई सम्बोधन गर्दै राज्यसभा सांसद प्रकाशचिक बड़ाइक भने,म नेपाली कम्युनिटीको विकासको लागि काम गर्नेछु| मैले डुवर्सका थुप्रै मुद्दा सांसदमा उठाएको छु| यहॉंका सबै कम्युनिटीहरू मिलेर यहॉंको उत्थानमा काम गर्नुपर्छ भने|
कार्यक्रमको विशेष आकर्षण ‘डुवर्स गौरव सम्मान’ थियो,जुन यसपालि वरिष्ठ साहित्यकार बिर्ख खड्का‘डुवर्सेली’लाई प्रदान गरियो| तिनलाई दोसल्ला, अभिनन्दन पत्र, स्मृति चिन्ह, नगद पुरस्कारसहित सम्मान गरिएको थियो| कृष्णमाया श्रेष्ठ स्मृति केन्द्रको नाममा तिनको छोरा अनन्त श्रेष्ठ अनि परिवारले उक्त पुरस्कार प्रदान गर्दै आइरहेको छ|
कार्यक्रमलाई सम्बोधन गर्दै साहित्यकार बिर्ख खड्का डुवर्सेलीले भने, डुवर्सभूमि र डुवर्सवासीलाई म नमन गर्दछु| यो सम्मानले पुरस्कृत गरेकोमा डुवर्स नेपाली साहित्य विकास समिति र डुवर्ससप्रति आभारी छु| आठौं श्रेणी पढ्दादेखि नै मैले साहित्यिक गतिविधि शुरु गरेको थिए| पहिलो कविता छापिँदा खुट्टा भुइँमा थिएन| दाङ खालिङ,कुमार प्रधान,सीके श्रेष्ठको सान्निध्यमा रहेकोले मलाई धेरै प्रेत्साहन प्राप्त भएको थियो| खालिङ सरको सुझाउ अनुसार मैले आफ्नो नामको पछि ‘डुवर्सेली’ लेख्न थालेको हो|
त्यस्तै समाजसेवी चुन्नीलाल नागलाई गरीब तथा आवश्यकता भएकाहरूको निःस्वार्थ सेवाका लागि सम्मान गरिएको थियो| सांस्कृतिक सत्रमा विभिन्न विद्यालयका विद्यार्थीहरूले नेपाली र आदिवासी नृत्यका आकर्षक प्रस्तुति दिएका थिए| डुवर्स नेपाली साहित्य विकास समितिका महासचिव रविन खवासले भने आजको कार्यक्रम निकै सफल रह्यो| नेपाली विद्यालयमा शिक्षक नियुक्ति तत्काल हुनुपर्छ,भाषिक अल्पसंख्यकको अधिकार लागू गर्नुपर्छ र गोर्खा विकास बोर्ड चॉंडै गठन गर्नुपर्छ भन्ने हाम्रो प्रस्ताव छ| यसका लागि हामी मुख्यमन्त्री ममता ब्यानर्जीलाई शीघ्र पहल गर्न आह्वान गर्दछौँ|
याे पनि हेर्नुस्
