नवनियुक्त तृणमूल कालचिनी ब्लक सभापति पेमा लामालाई भव्य स्वागत तथा सम्वर्द्धना
कालचिनी : अलिपुरद्वार जिल्लामा तृणमूल पार्टी हाईकमानले हालै घोषणा गरेका आठवटा ब्लक सङ्गठन सभापतिहरूलाई स्वागत तथा सम्वर्द्धना गर्ने सिलसिला शुरु भइसकेको छ। यसै क्रममा कालचिनी ब्लक तृणमूल कंग्रेसको नवनियुक्त सभापति पेमा लामालाई बुधबार कालचिनीस्थित सावित्री धर्मशालामा र ब्लक पार्टी कार्यालयमा भव्य कार्यक्रमकाबीच स्वागत तथा सम्वर्द्धना गरिएको हो।
कार्यक्रममा तृणमूल समर्थक तथा विभिन्न फ्रन्टल सङ्गठनका कार्यकर्ताहरूको बाक्लो उपस्थिति थियो। सहभागीहरूले फूलका गुच्छा, खदा र शुभकामना सहित नवनियुक्त ब्लक सभापतिलाई सम्मान गरेका थिए। यस अवसरमा नवनियुक्त तृणमूल महिला कांग्रेस कालचिनी ब्लक सभापति भारती कुजूर महली, युवा सभापति आकास हरिजन, र आईएनटीटीयूसी सभापति आनन्द चन्द्रालाई पनि विशेष सम्मान गरिएको थियो। सम्वर्द्धना कार्यक्रममा उपस्थित सबैलाई धन्यवाद व्यक्त गर्दै ब्लक सभापति पेमा लामाले आफ्नो पहिलो प्राथमिकता कालचिनी ब्लकको समग्र विकास रहने उल्लेख गरे।
तिनले गाउँ, वन बस्ती, बजार तथा दुर्गम स्थानहरूसम्म विकासको सुविधा पुर्याउने प्रतिबद्धता व्यक्त गरे साथै, तिनले पार्टी हाईकमानप्रति विशेष आभार प्रकट गर्दै जननेतृ तथा मुख्यमन्त्री ममता ब्यानर्जी, यूथ आइकन अभिषेक ब्यानर्जी, जिल्ला सभापति प्रकास चीक बडाइक, जिल्ला चेयरम्यान गङ्गाप्रसाद शर्मा लगायत सबै अग्रज नेताहरूलाई धन्यवाद ज्ञापन गरे। पत्रकारहरूसँगको अन्तर्क्रियामा सभापति लामाले विपक्षी दल भाजपालाई प्रहार गर्दै भने, “भाजपाका कालचिनी विधायकले खोला–नालाको मात्र निरीक्षण गर्ने तर समस्याको स्थायी समाधान गर्न नसक्ने गरेका छन्। यदि आफ्नो क्षमता प्रमाणित गर्न नसकिने हो भने तिनले पदबाट राजीनामा दिनु उपयुक्त हुन्छ।”
तिनले अझै थपे कि तृणमूल पार्टी मात्र वास्तविक अर्थमा जनता र विकासप्रति उत्तरदायी शक्ति भएको प्रमाणित भइसकेको छ।
कार्यक्रममा स्थानीय नेताहरूसँगै कार्यकर्ता, बुद्धिजीवी, सामाजिक अगुवाहरूको उल्लेख्य सहभागिता देखिएको थियो।
याे पनि हेर्नुस्
