कालचिनीः कालचिनी मात्र नभएर डुवर्सकै विशिष्ट समाजसेवी तथा साहसी राजनैतिक नेता पासाङ लामाको निधनले सम्पूर्ण क्षेत्रमा शोकको लहर छाएको छ। गत शुक्रबार राती हठात तिनलाई स्वास्थ्य बिग्रिएर उपचारार्थ सिलगढी पुऱ्याएको थियो। एउटा निजी नर्सिङ होममा तिनको उपचार चलिरहेको क्रममा शनिबार साँझ तिनले निधन भएको सुत्रबाट थाह लागेको छ। यता पासाङ लामाको निधनले सम्पूर्ण कालचिनी क्षेत्रको राजनैतिक, सामाजिक र साम्प्रदायिक माहौलमा शोकको लहर छाएको छ।
ज्ञात रहोस् पासाङ लामालाई सबैले आफ्नै ढङ्गको एक साहसिक नेता औ समाजसेवीको रुपमा चिन्दथे। विगत २०२१ सालको विधानसभा चुनाउमा पासाङ लामा कालचिनी विधानसभा आसनबाट तृणमूल प्रार्थीको रुपमा उभेका थिए। तिनी चुनाउमा पराजित भए तापनि आफ्नो सामाजिक सेवा कार्यमा कहिले पछि हटेनन्। निरन्तर जन सेवा गर्दै तिनी बीचमा कंग्रेस शिविरमा सामेल भएर राजनैतिक यात्रामा थिए। तिनले आफ्नो व्यक्तिगत लागतमा कालचिनी चौपति, राजाभातखावा, र चुवापाडा चियाकमानमा शहीद मेजर दुर्गा मल्लको सालिक स्थापना गरेका छन् भने अझै धेरै ठाउँमा तिनले सालिक स्थापना गर्ने एवम् असहाय गरीब मानिसहरूको निम्ति घर निर्माण गर्दै आइरहेको थियो। गत २० अगस्तको दिनदेखि तिनकै उद्योगमा बुखिमबारीमा नर्थ बेङ्गल गोर्खा कप २०२५ को शुरुवात भएको छ। तर हठात यसरी मझधारमा नै पासाङ लामाको भौतिक यात्रा अन्त भएको खबरले सबै मर्माहत बनेका छन्।
