तृणमूल ब्लक कमिटीमा फेरबदल, कालचिनी ब्लक सभापतिमा पेमा लामा र मदारीहाट वीरपाडा ब्लक सभापतिमा विशाल गुरुङ
कालचिनी : तृणमूलको साङ्गठनिक पुनर्गठन र नेतृत्व परिवर्तन चलिरहने क्रममा डुवर्सको अलिपुरद्वार जिल्ला र जलपाइगढी जिल्लाको ब्लक कमिटीमा फेरि नयाँ फेरबदल भएको छ। अलिपुरद्वार जिल्लाको कुमारग्राम, अलिपुरद्वार एक, अलिपुरद्वार टाउन, अलिपुरद्वार दुई फालाकाटा रुरल, फालाकाटा टाउन, मदारीहाट वीरपाडा र कालचिनी ब्लक मिलाई जम्मा ८ वटा साङ्गाठनिक ब्लक सभापतिमा धेरै नयाँ अनुहारलाई तृणमूलले अघि ल्याएको छ। मूलतः कालचिनी ब्लक सभापतिको पदमा असीम पाख्रिनको ठाउँमा जयगाउँका युवा नेतृत्व तथा पञ्चायत सदस्य एवम् पूर्व आईएनटीटीयूसी ब्लक सभापति पेमा लामालाई नियुक्ति दिएको छ भने मदारीहाट वीरपाडा ब्लक सभापतिमा वर्तमान जिल्ला परिषद सदस्य तथा पूर्व तृणमूल युवा कांग्रेसका अलिपुरद्वार जिल्ला सभापति विशाल गुरुङलाई नियुक्त गरिएको छ।
यसैगरी तृणमूलका ब्लक युवा, महिला अनि आईएनटीटीयूसीमा फेरबदल गरिएको छ। कालचिनी ब्लक युवा सभापतिमा युवा कार्यकर्ता आकास हरिजनलाई ल्याएको छ भने कालचिनी ब्लक महिला सभापतिमा वर्तमान जिल्ला परिषदका सदस्य भारती कुजूर महलीलाई चयनित गरिएको छ। यसरी नै आईएनटीटीयूसी कालचिनी ब्लक सभापतिमा आनन्द चन्द्रालाई चयनित गरिएको छ। यता तृणमूल हाइकमानले ब्लक सभापतिको सूची मंगलबार सार्वजनिक गरेपछि कतिपय आदिवासी अनि मुस्लिम समर्थकहरूले दलले उनीहरूलाई उपेक्षा गरेको गुनासो गरेका छन्।
यता तृणमूलको साङ्गठनिक फेरबदलको कुरा लिएर तृणमूलभित्र जिल्ला अनि ब्लक नेतृत्वहरूमाझ शीतयुद्ध चलिरहेको थियो भने आपसी मनमुटाउ चलिरहेकोबीच मंगलबार सूची सार्वजनिक भएपछि कतै खुसी तो कतै मौनता छाएको पनि देखिएको छ। यद्यपि दलभित्रको क्लेश बाहिर आउन नदिन जिल्ला नेतृत्वले कुनै प्रकारको मनमुटाउ नरहेको र दलको निर्देश सबैलाई मान्य रहेको जनाएका छन्।
याे पनि हेर्नुस्
