कालचिनीः बुधवार राती राइमटाङ जङ्गलबाट आहारको खोजीमा अच्छापाडा विजयपुर बस्तीमा पसेको हात्तीले सो गाउँका बासिन्दा विशाल कार्कीको घर क्षतिग्रस्त बनाएको थियो। बिहीवार उक्त घटना संज्ञानमा आएपछि तृणमूल कालचिनी ब्लक सभापति असिम पाख्रिन लगायत ब्लक उपाध्यक्ष ओमदास लोहार, ब्लक नेता अतिश छेत्री र सन्तोष गुरुङ पीडितको घरमा पुगेर निरीक्षण गर्दै आवश्यक राहत सामग्री प्रदान गरिएको बताइएको छ।
तृणमूल कालचिनी ब्लक कमिटीको पक्षबाट पीडित परिवारलाई बन विभागबाट पाउने क्षतिपूर्ति राशि दिलाउन मदत पुऱ्याउने बताउँदै राहत सामग्री प्रदान गरिएको जनाएका छन्। राती गाउँमा पसेको हात्तीले घर भत्काउन थाल्दा विशाल कार्कीका परिवारहरू भाग्यले बाँचेको बताइएको छ।
