मलाई  मात्र खिचेर राखेको छौ कि तिमीले
अथवा अरू कोहीलाई  पनि?
यो प्रश्नले  धेरै पीडा दिन्छ  मलाई,
त्यसकारण तिमीबाट यसको उत्तर पनि सुन्न चाँहदिन म
तिमीलाई सम्झी सम्झी रमाईरहने यो मनलाई
बेकारमा घायल बनाउन म चाँहदिन ।

कथङ्काल यो प्रश्नले तिम्लाई रीस उठ्यो भने
त्यो रीस साँच्चीकै ममाथि  खनियो भने
बेकारमा  आफु अपहेलित भएको पीडा सम्झी सम्झी
कण्ठहरूमा परेको गाँठो
तल-माथि गर्दै
बस्नु मात्र  हो।
हुन त
तिम्ले मलाई खिचेको कहाँ हौ र?
तिमी छौ र म आफ्फै खिचिएको मात्र हुँ ।
आफ्फै पनि खै के भनु र 
तिमीमा केही त छ
मलाई यसरी लालयित बनाउने
र म खिचिएको हुँ।
खै कस्तो गुरुत्वाकर्षण  छ तिमीसँग
जो तिम्रो शरीरभरी विराजमान  छ
तिम्रो अस्तित्वमा नै विराजमान  छ।
खै तिम्लाई म के देख्छु कुन्नि
जब म तिम्रो तस्विर देख्छु
जब म तिम्लाई सशरीर देख्छु
मनमा चाहनाको ज्वारभाटाहरू
पागल भएर उर्लिन थाल्छ
खुशी र उमङ्गका बतासहरू
आँधी हुन थाल्छ ।
जसरी ब्रम्हाण्डमा  ग्रहहरू असङ्ख्य छन्
तर पनि  पृथ्वीले मात्र सृष्टिलाई तानेर अड्काएको छ ।
त्यसरी नै दुनियाँमा तिमी जस्ता अनेकौँ छन्
तर तिम्ले मात्र मलाई तानेर
अड्काएका छौ।
म बुझ्न सक्तिन तिम्रो यो गुरुत्वाकर्षण
न म तिम्रो यो आकर्षणबाट
छुट्न नै सक्छु ।
खै तिमीमा के त्यस्तो गुरुत्वाकर्षण  छ
म बुझ्न पनि सक्तिन !